عدد الزوار

free counters

الأحد، نوفمبر 22، 2009

جعلوا من العابهم حروبا ومن حروبهم العابا

اذا اعجبك عنوان التدوينة فهي كلمة للاستاذ حسن المستكاوي

في مباريات الدوري الجزائري غالبا ما تنتهي المباريات بجرحى وقتلى .. المشكلة في ان القتلى عادة يذبحون
المشكلة بالنسبه للجماهير هناك ليست الموت ولكن كيف ستموت ... !

في عام 1989 كانت هناك انتخابات برلمانيه او رئاسية لم يشير الاستاذ حسن المستكاوي الى اي نوع من الانتخابات ولكن ما حدث هناك انها انتهت بموت 150 الف جزائري ... !

ما حدث في السودان كان نتيجة اسباب كثيرة منها
جريدة الشروق الجزائرية التى راحت تكتب عن جثث جماهير جزائرية وصلت الجزائر قادمه من مصر بعد فوز مصر في المباراه الاولى
السفير الجزائري في القاهرة اكد مرة ونفى مرة ... !

يقال ان بوتفليقة مريض جدا وان اخوه يريد ان ياخذ السلطة من بعده وانه هو وراء هذه الاحداث ، يساعد بلده في التاهل لكاس العالم ليثبت اقدامه ... !

حشدت الجزائر الاف المشجعين انتهت رحلات الطائرات المدنية فاستعانت بالقوات الجوية الجزائرية لنقل الجماهير عبر الطائرات الحربية والتى راها الكثير من المصريين هناك ... !

ما حدث انه الجزائر تعاملت بمنطق ان الغايه تبرر الوسيلة
بلطجية وقوات نظامية وشحن اعلامي .. الخ من وسائل كثيرة يسهل سلوكها
الغلط سهل قوي يتعمل
الاذية برضه سهله
الحرام مفيش اسهل منه

هما عملوا كده
احنا بقى ما عملناش ده وده كويس لكن لم نحطاط سبناها للظروف
لا سفير - سفيرنا في السودان - عايز يعمل مشاكل طول فترة خدمته فيكتم على اللى شايفه بيحصل في السودان ناس بتشتري سكاكين وسنج ورايحه قبل الماتش بـ 4 ايام وبايته في خييم معسكرين يعني .. شكلهم فعلا قوات جيش مش مدنيين

كله تمام يا ريس جملة بتتقال في كل مصلحه حكومية مصرية من المرؤس الى رئيسه ماحدش عايز يشتغل صح وكان الشغل وانك تبلغ عن كارثه احتمال تقع كانك بتثير مشكلة ايه يعني شوية مواطنين ياخدوا على قفاهم وينجرحوا ويتشوهوا ويطلع ... ابوهم احنا كبار ... !

حتى الرئيس مبارك خرج وقال في كلمة لنواب الشعب والشورى اننا لا نقبل بالاهانه ولكنا نلتزم بضبط النفس
يا اخي جتك نيلة مكنتش جيت احسن ولا وريتنا خلقتك ولا سمعتنا صوتك

يقال ان ما وراء هذه الفتنه اما الموساد الاسرائيلي او المخابرات الفرنسية
طيب الموساد ومعروف مقصده انما المخابرات الفرنسية ليه ؟

قالوا ان فرنسا عايزة تحارب الوجود المصري في الجزائر اللى بيدعم الهوية العربية والاسلامية في الجزائر !!
وانها عايز تكمل عملية تغريب الجزائر ما احنا بنسمع عن ان حلم الجزائريين الحصول على الجنسية الفرنسية

بيقولوا الجزائريين ومعظم العرب مخنوقين من مصر عشان موقف مصر من فتح معبر رفح في حرب غزة الاخيرة وان ده انتقام منا او تعبير عن غضبهم على الرغم من ان الكل عارف الفرق بين مصر الحكومة ومصر الشعب

قالوا وعادوا وزادوا
وانا معنديش حاجه اقولها غير " انا قرفت "

الثلاثاء، نوفمبر 10، 2009

يا اما محدش .. يا اما محدش !!

محدش عايز يحب الخير للناس

محدش عايز يدور على المصلحه العامة

محدش عايز يعمل لمصلحه الناس والبلد

محدش عايز يتقن في عمله

محدش عايز يقضى حوائج الناس

محدش عايز يكون ايجابي

محدش عايز يملى الدنيا سلام

محدش عايز يسال على جاره

محدش عايز يشترك في عمل عام

محدش عايز يقرا ويتثقف ويفيد نفسه وبلده

محدش عايز يقول للظلم والباطل لا

محدش عايز يقول الحق

محدش قادر يقف في وجه الظلم والظالم

الكلام ده لو صحيح 100 الـ 100 هتبقى كارثه ونهاية الدنيا ..

عشان كده قدامنا حل من اتنين يا نكون محدش يا نكون محدش ..

كونوا محدش ...

مين ناوي يبقى محدش ؟؟

الخميس، نوفمبر 05، 2009

إلزام جامعة أسيوط بتسليم شهادات تخرج للطلاب بعد دفع 14 جنيهاً فقط

جايبلكم خبر زي العسل يخصني ويخص كل زمايلي :

أسيوط – خالد العسقلاني :

أصدرت محكمة القضاء الإداري بأسيوط برئاسة المستشار حسام عميرة قرار برفض الاستشكال المقدم من جامعة أسيوط ضد الحكم الصادر في 2 مارس 2009 بإلزام الجامعة بتسليم الطلاب المسددين للرسوم القانونية – 12 جنيها للانتظام و14 جنيها للانتساب – شهادات مؤقتة لحين الفصل في موضوع الدعوى المقامة ضد الجامعة بإلزامها بقبول المصروفات التي حددها القانون وهي 12 جنيها للانتظام و14 جنيها للانتساب .

كان الطالب محمد فاضل قد أقام دعوى أمام القضاء الإداري بان الجامعة تقوم بتحصيل مصروفات دون سند قانوني حيث رفضت الجامعة تسليم عدد من الطلاب شهادات التخرج .

وأشار الطلاب إلى أن هذا الحكم نهائي وواجب النفاذ ويتعين على الجامعة تنفيذه وفي حالة الامتناع عن التنفيذ سوف نقوم برفع جنحه مباشرة ضد الدكتور محمد مصطفى كامل رئيس الجامعة بصفتة مطالبين بحبسه وعزلة .

================================================================
قبل ما اكتب تعليقي احب اقلكم على موقف طريف حصلي مع الدكتور مصطفى .. ليا صديق اسمه مصطفى كامل دخل
الجيش معايا هو فبتصل بيه ليلة ما كنا مسافرين فبدل ما اتصل بمصطفى كامل زميلي اتصلت بمصطفى كامل رئيس الجامعه المهم قلت الو قال ايوة يا فندم لقيت الصوت متغير قلت مصطفى معايا قال اه معاك مصطفى قلت ايوة ياض امال صوتك متغير كده ليه هههههههههههه راح قايلي نعم

حضرتك عايز مين قلتله مش مصطفى كامل معايا قال اه قلتله مصطفى كامل مين قالى انا الدكتور مصطفى كامل رئيس جامعه اسيوط قلتله اهلا معلش طلبت الرقم غلط وقفلت وجاتلي هيسترية ضحك ..نخش بقى في موضوعا ..

ولا على بالي تاني يوم في أجازتي صاحي الصبح بدري العب شوية رياضه واشترى الجرايد وأشوف الدنيا فيها ايه اشتريت الدستور النهاردة لقيت الخبر ده ...

طبعا فرحت واتنطتت وده لاني احد هؤلاء الطلاب وكمان محمد فاضل ده صديقي اللى ندل معايا وما اضافشي اسمي في الخبر ولا اسم صديقنا الحسيني ههههههه يالا تتعوض في الحكم النهائي .

القصة يا حضرات ان محمد فاضل والحسيني احد النشطاء السياسيين في جامعة اسيوط اللى اتعرفت عليهم متاخر قوي يدوب في سنه رابعه يعني وانا بنهي دراستي الجامعيه عرفت منهم انهم ناصريين

لكن في الوقت ده هما مستعدين يتعاونوا مع أي تيار المهم مستقبل مصر وشبابها ومحاربة الفساد والى اخره من اهداف واحلام نحلم بها جميعا ..

عرفت منهم قصة لائحة تنظيم الجامعات وما تنص عليه من ان الرسوم التى فرضها القانون هي 12 جنيه لطالب الانتظام و14 جنيه لطالب الانتساب دخلت معاهم في القضيه وفي حملة الدعاية ليها

لكن مكنتش على قدر نشاطهم الغير عادي .. روحنا الى لجنة فض المنازعات في الجامعه وايدتنا ودي صورة من التوصية التى اصدرتها
بعد كده الجامعه رفضت التوصية دي فلجأنا الى القضاء الاداري وهو المختص باي نزاع بين الافراد والجهات الادارية طبعا الجامعه راحت اصدرت شوية قرارات ارهابيه زي مثلا حرماننا من دخول الامتحانات طالما لا نحمل الكارنيه الجامعى اللى مش هيطلع غير لما نسدد الرسوم الغير قانونية اللى وصلت دلوقتي الى 280 جنيه لطالب الانتظام و600 جنيه لطالب الانتساب

طبعا قدمنا طلب مستعجل للمحكمة اللى حكمت بدخولنا الامتحان مع حجب النتيجه ده لان الطلب المستعجل يحكم فيه بحكم يرضي او يوازن بين مصلحة الطرفين ..
الجامعه اصدرت قرار جديد بعدم صرف لنا شهادات التخرج وده حقها لانها محل نزاع ..

لجأنا للمحكمة وطالبنا بحكم مستعجل يمكننا من استخراج شهادات مؤقتة حتى لا تفوتنا اجراءات التجنيد حتى لا نتعرض لعقوبات عسكرية نتيجة التاخر او التهرب من التجنيد ..
ولحفظ حق الجامعه اصدر القضاء الاداري قرارا باحقيتنا في استخراج شهادات مؤقته مع كتابه عليهم عبارة غير مسوغة للتعيين ..

ولكن رفضت الجامعه تنفيذ هذا القرار حيث ذهبنا الى الجامعه ثلاث مرات لتنفذ الحكم
الاولى قابلنا رئيس قسم الشئون القانونية الاستاذ محمد عبد القادر اللى استقبلنا احسن استقبال واخد الحكم

واشر عليه من نائب رئيس الجامعه واستغربنا من سرعة استجابة نائب رئيس الجامعه انما استغرابنا وفرحنا لم يدم طويلا فجاء محامي الجامعه وقال لرئيس قسم الشئون القانونية التاشير غير قانوني وده لان نائب رئيس الجامعه ما يقدرش ياخذ هذه الصلاحيه في ظل وجود رئيس الجامعه داخل جمهورية مصر العربية وانما ياخدها لما يكون الرئيس مسافر بره مصر بس ...

يا سلام يعني رئيس الجامعه عنده اربع نواب وفي الاخر مفيش واحد منهم عنده صلاحيه تاشير حكم محكمة لتنفيذه طالما هو موجود جوه مصر يعني لمجرد ان الدكتور مصطفى كامل كان مسافر القاهره يبقى خلاص ... قلنا ماشي طيب هو جاي امتى بسلامته قالوا يومين كده ..

بعد يومين روحنا الجامعه رئيس قسم الشئون اخد مننا الحكم ودخل لرئيس الجامعه اللى رفض تنفيذ الحكم دخل علينا الاستاذ محمد عبد القادر وقالنا كده طبعا اتعصبنا وقلناله دا انت راجل قانون وعارف يعني ايه حكم محكمة عقوبة عدم تنفيذ او تعطيل حكم قضائي حط وشه في الارض وسكت ..

اخدنا منه الحكم ورحنا داخلين لرئيس الجامعه طبعا مدير مكتبه قالنا انه مشغول طالما مش معانا ميعاد سابق راح الحسيني اتصل برئيس الجامعه اللى قاله اوك ادخل ..

دخلنا كان بيتكلم في التليفون خلص تليفونه وقالنا بعصبية ايوة يا حضرات قلنا ده حكم محكمة واحنا طالبين التنفيذ راح خطب فينا انه كيف نرفع قضية على من علمنا على من له الفضل علينا في من صنع منا محامون في من .. وفي من وفي من ..الخ

لما ردينا عليه بالمنطق وبالعقل راح انفجر فينا وشخط ونطر ولقينا واحد بيحط ايده في وسطه وبيقول مش انتوا اخدتم حكم وده حقكم .. انا بقى هستأنف واستشكل وده حقي .. طب يا فندم شهادات عشان الجيش مش عشان تعيين وحضرتك عارف انه مفيش وظايف اصلا قال نعم يا اخويا جيش

انت مش عاملي فيها وطني انت وهو روح ادخل الجيش
وهنا كنت هانفجر من الضحك واقله دا انت مسخره يا جدع هههههههههههه المهم اخدنا ورقة الحكم ورحنا ماشيين وقلنا عوضنا على الله

طبعا انا عشان ما اتاخرش على جيشي واتحاكم روحت دفعت الرسوم وطلعت شهادتي ودخلت الجيش خلاص لكن كنت منتظر الحكم في الاستشكال واهو صدر وكمان الحكم في القضية نهائيا اتاجل ليوم 5 يناير 2010 لان في التوقيت ده جميع دوائر محكمة القضاء الاداري هتتغير طبعا تشكيلها ولما سالنا عرفنا ان ده اجراء متبع من زمان وده حسب لائحة تشكيل المحكمة .
وفي انتظار جلسة 5 يناير وان شاء الله منصورين ..


اصعب لحظات
========
كانت اصعب سنه عليا سنه رابعه دي من بعد ما دخلت في القضية دي وانا كنت متكهرب بس في نفس الوقت حبيت اجرب واعمل حاجه بدال ما ابقى كلام مش افعال ..
كان في ردين جاهزين عندي لكل مستفسر عن سبب سلوكي هذا المسلك
الاول كنت بقوله للى بيقدر وبيفهم هو ان لازم حد يقول لا ولازم يحاول ويجرب ويغامر مادام عايز يسترد حقوقه وان في غيري مش هيقدر يدفع الـ 600 جنيه او حتى الـ 200 جنيه وانه كمان ميقدرش يدخل في نزاعات لانه معظم الفقرا فقرا وبيمشوا جوا الحيط كمان ..

الثاني كنت برد بيه على اللمض اللى يقعد يقولي بقى احمد سعيد ابن واخو واصل وفصل يرفع قية ويعرض نفسه للمشاكل عشان 600 جنيه هو انت محتاج .. كنت بقوله ياعم انا فاضي ومش ورايا حاجه وبجرب وبعدين انت عارفني من زمان مشاكس ولساني طويل وغاوي مشاكل - طبعا ده كان زمان دلوقتي اتغيرت الحمدلله - وبعدين امتحانات وهدخل نتيجه واخويا وغير اخويا هيجيبهالي لما ينشفوا دماغهم في قصه شهادة التخرج هبقى ارميهالهم على الجزمة ..

الردين دول قلتهم في يوم نة التيرم الاول لما روحت لقيت كل اصحابي عرفوا النتيجه وبيسشألوني عن نتيجتي .. لما اللى ك فرحان فرحان والى كان زعلان زعلان وانا محلك سر واقف عادي بيني وبينكم كنت مدايق طبعا بس في نفس الوقت مكنشي هاممني قوي وكنت عارف ان مفيش حاجه سهلة او ببلاش لازم هقم تضحيات - طبعا دي تضحيات لا تذكر ده اذا كان ينفع نقول تضحيات - ..

البيت سالني على النتيجة شرحت لهم وجة نظري بكل صراحه بابا كان عارف من الاول لاني استئذنته وبصراحه كنت بعلمه بقراري مش اكتر يعني لو كان عارضني كنت هاطلب منه انه يسيبني اجرب .. ماما طبعا وزي كل الامهات سكتت في الاول وبعد فترة بقيت تقولي واحنا محتاجين وليه يا ابني ركز في دراستك ياللى نازل في مادتين ومرة ربنا يوفقك هههههه وكعادة الامهات متقلبات في الاراء ولكن

في النهاية مصلحة اولادها هي المقصد الوحيد .. كان كل واحد يسالني عن نتيجتي سبب دخولي في القضية كنت بتخنق لان كل واحد يسمع مني يروح مسلم عليا وكانه بيسلم على عرابي ولا زغلول .. من اصعب اللحظات برضه لما عمتي جت من السعودية وهي اعز شخص في اقربائي كلهم بدون استثناء طبعا يومها العيله اتجمعت واحنا ما شاء الله البيت كله حسبة 35 نفر غير اللى مسافرين

الموضوع اتفتح لقيت عمتي كشرت ورفضت تتكلم في الموضوع وكانها مدايقه مني روحت سايبهم وقايم .. راحوا اشتغلوا بقى تقطيع فيا وليه ومش ليه وكل ما تتخيلوا طبعا كان عذري الوحيد ليهم انهم ناس تقليديين جدا واتربوا على ان المطالبه بالحق والنزاع عليه مش من سمات الناس المحترمه الهادية ولاد الناس .. دخول المحاكم عيب ووصمة عار .. لكن الحمدلله ابن عمتي دافع عني دفاع مستميت وكل

اللى منعه من انه يدخل قضية زي دي ان والده رافض المبدا ده من اساسه كما انه بياخد على خاطرة جامد فمحبش يزعله او يعصبه .. لما ابن عمتي قالى على اللى حصل واعرف اللى اتقال عليا روحت رايح شقتي - القبو بتاعي - وقعدت ابكي لان الناس حسستني انى حاجه الكل بيتبرا منها او انى مخلوق تاني تمام لما بنعرف ان حد جاله استدعاء من امن الدولة بن خايفين منه وكانه مجرم .. تمام مشبوه حسيت انى مشبوه حتى زمايلي في الجامعه بس ساعتها افتكرت موضوع درس كان في كتاب الانجليزي بتاع ابتدائي لما كان في خمس صور

لجحا وابنه وحماره اول صورة جحا وابنه راكبين على الحمار
ساعتها الناس قوا ايه ده مفيش رحمة ..

راح نزل جحا وساب ابنه
ساعتها قالوا ايه الواد قليل الادب ده راكب وسايب ابوه يمشي

راح راكب جحا وابنه مشي على رجليه
ساعتها قالوا فين الرحمه بقى الطفل الصغير يمشي وابوه راكب

راح مشيوا ومحدش ركب الحمار
ساعتها قالوا ايه ده سايبين الحمار فاضي كده ومحدش راكب عليه الناس دي ايه

راح جحا وابنه شالوا الحمار ومشيوا بيه !!!

فعلا الناس مش بيعجبها العجب ولا الصيام في رجب .. كل واحد ليه وجهة نظره ورؤيته الخاصه به ومش كل نصائحهم مناسبه ليا ..

ياريت اللى عنده حد في الجامعه وشايف انه يقدر يدخل في القضية ديه ياريت يقوله ..
على فكرة عدد الطلبة المشتركين في القضية وصل لاكثر من 40 طالب من مختلف الكليات للدخول في القضية والمطالبة باسترداد الرسوم الزائدة ولمعلومات عن كل ما يخص القضية يمكنكم الاتصال على الارقام التاليه
0103882422
محمد فاضل محامي وناشط في مجال حقوق الانسان
0102781877
الحسيني .. صحفي في جريدة الفجر
0106255885
انا ..ربنا يفرجها
او مراسلتنا على
Md3_fadel@yahoo.com
Saeed_elmasry@yahoo.com

احمد المصري