عدد الزوار

free counters

الخميس، فبراير 19، 2009

تاااااج

شكرا يا زهرة بلدنا الماسيه على التاج واليكى ردودي
بدأتِ التدوين إمتى؟؟ ودخلتِ العالم ده إزاي؟؟

على البلوج سبوت من اغسطس 2008 لكن قبل كده كنت بكتب على البلوج اللى مخصصها موقع الهوت ميل من خلال الهوت ميل اسبيسز hotmail spaces بس مكنتش بكتب بانتظام لاني كنت بكتب في منتدى جميل اسمه تكنولوجيا المستقبل وللاسف السيرفر بتاعه وقع ...
اما ازاي دخلت العالم ده ؟ فانا من 2007 وانا بفكر في انى اعمل مدونه لكن كنت بصراحه فاكر ان الامر مش سهل ولازم ابقى متقيد بحاجات كتير
لكن اللى كان ليه نصيب في تشجيعي على التدوين هو متابعتي لمدنة الدكتور هيثم وكمان انخراطي في مجال السينما من ناحيه تجربتنا في عمل فيلم هواه وكمان انى قريت كام كتاب في المجال ده وكمان مناقشاتي السينمائية مع اصحابي اللى لقيت انها بتعجبهم ده غير انى مسحوب من لساني وبحب اكتب راي دائما في كل المجالات اللى بحس انى بفهم فيها .....


السؤال التاني إيه كان إنطباعك ف البداية؟؟

كان فرحي قد خوفي وده لاني شخص حساس جدا يعني التعليق اللى ما يصبشي يدوش ههههههههههه لكن الحمدلله الحساسية الزياده دي تكاد تكون اختفت واسمحيلي اكمل بجز من كلامك " بجد احساس رائع انك تطلع اللى جواك انا بحب اكتب كل حاجه بحس بيها حتى لو محدش قراها او ادانى رايه بس ساعات بتحس انك عايز تقول اللى جواك لحد فمش بتلاقى قدامك غير مدونتك تطلع فيها اللى جواك "

السؤال الثالث: مين أكتر حد بتحب تعليقه عـ البوست الجديد؟؟
اللى بيفدني واللى الاقي منه معلومه جديده داخل الموضوع اللى انا كتبته ببقى فرحان جدا من تعليقه وغالبا اللى بينطبق عليه الكلام ده هو الدكتور هيثم ( حظك كده بقى ) وطبعا بيفرحني قوي تعليقك وكمان المتواجده دائما rania ....

السؤال الرابع: إيه أهــــم حاجة إتعلمتها في عالم التدوين؟؟
اتعلمت الدقه والصبر ... الدقه في انى لما انوي اكتب عن حاجه لازم ابقى دقيق في تفاصيلها وافكر فيها كذا مرة قبل ما اكتبها وكاني رئيس تحرير الاهرام مثلا ..
الصبر .. وده لاني ساعات كنت بتسرع واكتب موضوع من نار وفجاه الاقي نفسي غلطت في تفصيلة صغيرة تهد كل الى انا كتبته وفكرت فيه واستنتجته

السؤال الخامس: إيه أكتر حاجة كرهتها؟؟
كرهت الحظ السئ والنظام عندنا في مصر وده بسبب ان مريت على مدونات كتير اصحابها بجد افضل من رؤساء تحرير كتير ورغم ذلك مش واخدين فرصتهم
وعلى عكسك تمام ... كرهت انى اكون صاحب راي او فكر او انى مش تافه ...الخ

السؤال السادس: حاسس إن التدوين ليه تأثير ؟؟
بالتاكيد

السؤال السابع: تهدي التاج لمين؟؟
اولا احب اشكرك على التاج الجميل ده واهديه للدكتور هيثم ( ولو انه مش بيحب التاج ) وانتى بالتاكيد وضيفتي الرقيقة rania

الثلاثاء، فبراير 10، 2009

لقاء اغسطس

لقاء أغسطس


دوماً اتذكر موعد لقاؤكِ

لأسعد بلحظة رؤياكِ

والتى لو غابت فحتماً سألقاكِ

مادام الخيال أداة من أدواتي

سأظل أعبث مع خيالي

لأجدك عروس ونعم العروس في أحضاني

والتى دائماً تمنت رضاكِ

وتبسمات من شفتاكِ

ونطقت شفتاي .. اهواكِ .. اهواكِ

وعيناي تنتظر رؤية عيناكِ

يا من تركت كل شئ للتفكير في يوم لقائكِ

كيف سأكون وهل سيكون .. ؟

أم هذا مجرد عبثاً خوفاً من عدم رؤياكِ ..؟

سأنتظر هذا اليوم ولو مل إنتظاري منى

فأنا لا أستطيع غيابك عني

أرجوكي يا من أمسكت لها ورقي وأقلامي

لا تجعلي لحظة لقائك مجرد حلم في قائمة احلامي

فأنا لا استطيع تحمل غيابك وعدم رؤياكِ

وماذا افعل إذا كانت هذه امنيةُُ من أمنياتك
فليساعدُنى ربى كى أقدر على فُراقك
.........................................

الأحد، فبراير 01، 2009

ما حدث في القوصية وبعض الاستنتاجات ...
منذ شهر مضى حدث الاتي ...
الله اكبر ولله الحمد ..بهاتين الكلمتين انفجر الغضب وانطلق الناس من الجامع الكبير الى الساحه للتنديد بموقف الحكومة المصرية ولنكن صرحاء لا يوجد هناك حكومة تملك قرارا بل من هناك شخص واحد فقط وراي واحد فقط وحزب واح فقط في هذه البلد " مبارك " لا نظيف ليه فيها ولا حتى جمال المستخبي ...طوق الامن جميع المخارج المؤدية الى شارع الجلاء من ناحية مدرسة السوق وصيدلية الدكتور مصطفى المقابلة للشركة الشرقية ايسترن كومباني " شركة السجاير " راح المتظاهرين شمالا ويمينا فلم يجدوا مفر ولكن بعد خروج الجنازة من الناحية الاخرى المفتوحه انطلق من وراها هذا الجمع الغفير ليجد طريقه الى شارع الجلاء عن طريق الشارع المؤدي للرعاية الصحية والى منزل وهبه .. ومن ثم امام قهوة على بابا وبجوار بحار حيث مكان التجمع والوقفة الاحتجاجية ..اجمل ما كان في المظاهرة هو خروج نساء السوق بعبايتهم السودا والشال الاسود مرددين " خيبر خيبر يا يهود .. " في مشهد لم نره من قبل حيث لا لم يظن احد ان تترك نساء السوق حالهم ومحتالهم وقفص القوطة عشان يطلعوا في مظاهرة ولن اخفي بان بعضهم كان بيضحك ضحكة اقرب للابتسامه وكانهم نفسهم يقولوا " احنا هنا " " احنا برضه طافحين الكيل وبنحس احنا بني اددمين "يا ناس ياعالم ..دي غير فرحه معظم الناس بانهم ملتفين حوالين بعض من غير ما يعرفوا بعض كويس ولكن يعرفوا ان اللى بيحصل في فلسطين ده مجزرة حقيرة وبغيضة وان موقف العرب خاصة مصر والسعودية موقف زباله قوي ولا يليق بمصر التاريخيه اللى اتكلم عنها هيكل ...المصريين اللى وقفوا زمان ايام احتلال هولندا لاندونيسا على شط القنال عشان يمنعوا السف الهولندية انها تعدي القنال عشان تشق طريقها لجنوب اسيا حيث اندونيسيا .. واندونيسيا مسلمين بس مش عرب ومسلمين زي غزة كمان وعندما سالت واحده منهم كانت تحمل حفيدها ان تقف جانبا حيث بعض النساء قالت لي " لأ انا هاقف هنا .. ورا محمود حلمي (عضو مجلس الشعب عن دائرة القوصية وانتمائه -اخوان مسلمين) عشان غزة "يا استاذ احمد .... للعلم هي جارتنا في الشارع ..وبعد ذلك انطلقنا الى ان وصلنا الى ميدان السينما والنافورة وكان هو اكبر تجمع في تلك الوقفة ورددنا يا حكامنا خافوا الله اهالينا في غزة بيقولوا اه ...وقفنا ما يرقب العشر دقائق ثم انطلقنا سائرين الى بحار وقهوة على بابا حيث مكان التجمع وكان النائب محمود حلمي يردد وهو محمولا على الاعناق " تسقط تسقط اسرائيل .. ويسقط معها كل عميل ..وبعد ان وصلنا الى المكان المحدد حًمل الدكتور اسامه وخطب عن تجديد النيه في هذه المظاهرة واننا نبتغي وجه الله بها وبعد ذلك جاءت للنائب محمود حلمي مكالمة من القيادي محمد نزال عضو حركة حماس والى شكر فيها القوصية واهالى الصعيد عامة وحياهم على وقفتهم مع ابناء فلسطين وشدد على دور مصر الكنانه ومصر العروبة ومصر الاسلاميه وبعد ذلك حرقوا النجمة الزرقاء وبها جزمة بوش بعد ذلك صعد احمد صلاح حسانين للدعاء وانتهت الوقفة ....
وقد اثبتت هذه الوقفة شئ كنت افكر فيه هو
ان العامه تتحرك مع تحرك النخبه وهم هنا الاخوان المسلمين وبعض قيادات حزب التجمع (وهو استنتاج ليس مطلقا ) وقد رأينا كيف خرجت نساء السوق وراء المظاهرة ..
من فوائد هذه المظاهرة ان الاطفال اللى اتوزع عليهم المنشوارت اللى فيها صورة قعدوا يتفرجوا على الصور واتربى عندهم وعي من اللى شافوه ده وكمان الناس اللى قاعده في البيوت وكانت باصه من البلكونات وولادها لما شافوا المنظر ده اكيد سالوا اهاليهم فيه ايه ؟
ايه اللى بيحصل ؟
ماما .. ماما .. هي الناس دي مالها ..
يعني كان في حراك في الشارع بسبب موضوع غزة ده
وانا يرضيني قوي ان مظاهرة قد كده تطلع عشان القضية تتجدد في نفوس كتير من شباب واطفال اليوم ...